בארא פארק און “בי ענד עיטש” אויף גוגל סטריט וויו

גוגל סטריט וויו (וואו מען קען ארומפארן אויף גוגל מאפעס “אין” די גאסן) האט די לעצטע וואך אנגעהויבן צו אפדעיטן די בארא פארקער גאסן, צו פיל קלארערע בילדער, נישט מער ווי צום צווייטן מאל זינט זייער ערשיינונג אפאר יאר צוריק.
נאכנישט אלע גאסן זענען געאפדעיט, אזא גאס ווי 13′טע עוועניו איז בלויז ביז 48 סטריט, און די באקאנטע ככר שומר שבת איז נאכנישט געאפדעיט געווארן. און די וואס ווילן זיך נאך באגעגענען מיט א בארא פארק פון 6 יאר צוריק קענען דאס נאך אריינכאפן אויף טייל גאסן.
גוגל איז נישט מודיע פון פאראויס, און געבט נישט קיין שום רמז וועלכע גאסן זיי גייען אפדעיטן אדער די ערשטע מאל ארויפלייגן אויף גוגל סטריט וויו, און עס איז בלויז אינטערסאנט אז וויליאמסבורג איז שוין געאפדעיט געווארן פאר 2 יאר צוריק. אזא שטאט ווי קרית יואל איז – גענוי ווי פילע אנדערע אפסטעיט שטעטלעך – בכלל נישט אויף סטריט וויו, בשעת מאנסי וועלכע איז נענטער צו דרום פארמאגט נאך די אלטע אומקלארע בילדער. און אינעם ווייטן מאנטריאל קען מען אזש אריינשפאצירן אין קרית טאהש מיט הערליכע קלארע בילדער.
*
אין אנדערע גוגל וויו נייעס, עס איז געווען לעצטענס ברייט באריכטעט אין די פרעסע אז די היימישע פירמע “בי ענד עיטש” איז פון די ערשטע געשעפטן אין מאנהעטן ארויפגעלייגט צו ווערן אויף גוגל “סטאָר” וויו, וואו מען קען אריינשפאצירן אין זייער געשעפט בשעת מען איז אויפן קאמפיוטער, און באטראכטן די שיינע שורות מיט פראדוקטן ווי כאילו מען איז יעצט באמת אין געשעפט.
עס איז אינטערעסאנט ווי דאס געשעפט איז גענצליך אפגעליידיגט געווארן אינמיטן טאג, כדי צו קענען נעמען די בילדער, ווי עס שיינט איז עס געווען א אפגעשמועסטע צוזאמארבעט מיט גוגל.
דער טעכנאלאגיע האט גרויס פאטענציאל צו ווערן א טאג טעגליכע טייל פונעם מאדערענעם אינטערנעט מארקעטינג וועלט, וואס מען זוכט אלץ ווי מער און מער באקוועמער צו מאכן דאס איינקויפן אויפן אינטערנעט.